நெல்லை டவுணில் பால் வியாபாரி வெட்டிக்கொலை

நெல்லை டவுணில் பால் வியாபாரி மர்ம நபர்களால் சரமாரியாக வெட்டிக்கொலை. உறவினர்கள் கொலையான நபரின் உடலை எடுக்க விடாமல் சாலை மறியல் போராட்டத்தில் ஈடுபட்டதால் பரபரப்பு ஏற்பட்டது.

நெல்லை டவுண் பகுதியைச் சேர்ந்தவர் பழனி. இவருக்கு மூன்று மகன்கள் உள்ளனர். இவரது மூன்றாவது மகன் கண்ணன்(40). திருமணம் ஆகாத இவர் பால் கறவை தொழில் செய்து வருகிறார். மேலும் நெல்லையப்பர் கோவிலில உள்ள கோசாலை பராமரிப்பு பணியையும் தற்காலிகமாக பார்த்து வருகிறார். வழக்கமாக நெல்லையப்பர் கோவிலில் கோசாலை பராமரிப்பு பணிகளை முடித்து விட்டு இரவு வீடு திரும்பும் நேரத்தில் வீட்டிற்கு வந்த அவர் வீட்டின் முன்பு தனது இருசக்கர வாகனத்தை நிறுத்தி விட்டு வெளியே செல்வதாக சொல்லி விட்டு வீட்டில் இருந்து சுமார் 200 மீட்டர் தொலைவில் உள்ள ஏ.பி.மாடத் தெரு பகுதியில் கண்ணன் வந்து கொண்டிருந்த போது அவரை வழிமறித்த மர்ம நபர்கள் சரமாரியாக வெட்டி விட்டு அங்கிருந்து தப்பி சென்றனர். கண்ணனின் அலறல் சத்தம் கேட்டு சம்பவ இடத்திற்கு வந்த அக்கம்பக்கத்தினர் பார்த்தபோது கண்ணன் ரத்த வெள்ளத்தில் உயிரிழந்த நிலையில் கீழே கிடந்துள்ளார்.

இதனைத் தொடர்ந்து நெல்லை டவுண் போலீசாருக்கு அப்பகுதி மக்கள் அளித்த தகவல் படி சம்பவ இடத்திற்கு வந்த போலீசார் உடலை கைப்பற்றுவதற்கு முயற்சித்தபோது உயிரிழந்த கண்ணனின் உறவினர்கள் மற்றும் அப்பகுதி மக்கள் உடலை எடுக்க விடாமல் போராட்டத்தில் ஈடுபட்டனர். கொலை குற்றவாளிகளை உடனடியாக கண்டுபிடிக்க வேண்டும். கொலைக்கான காரணத்தை உடனடியாக தெரிவிக்க வேண்டும் உள்ளிட்ட கோரிக்கைகளோடு சாலை மறியல் போராட்டத்தில் ஈடுபட்டனர்.

இதனை தொடர்ந்து போலீசார் சம்பவ இடத்தில் குவிக்கப்பட்ட நிலையில் போராட்டத்தில் ஈடுபட்டவர்களுடன் நெல்லை மாநகர காவல் துறை துணை ஆணையாளர்கள் ஆதர்ஷ் பச்சோரா மற்றும் சரவணகுமார் ஆகியோர் பேச்சுவார்த்தை நடத்தி சம்பவ இடத்திலிருந்து உடலை மீட்டு நெல்லை அரசு மருத்துவக் கல்லூரி மருத்துவமனைக்கு உடற்கூறு ஆய்விற்காக கொண்டு சென்றனர். இதனை தொடர்ந்து நெல்லை டவுண் போலீஸார் வழக்கு பதிவு செய்து சம்பவ இடத்தில் உள்ள சிசிடிவி கேமரா ஆய்வு மேற்கொண்டு கொலைக்கான காரணம் குறித்து தீவிரமாக விசாரணை நடத்தி வருகின்றனர்.

நெல்லை டவுண் பகுதியில் பால் வியாபாரி கொலை செய்யப்பட்ட சம்பவத்தை தொடர்ந்து  பரபரப்பான சூழல் நிலவி வருவதால் ஏராளமான போலீசார் குவிக்கப்பட்டுள்ளனர்.

தூத்துக்குடி மற்றும் நெல்லை பகுதியில் நடக்கும் செய்திகளை தெரிந்தும் கொள்ள வாட்ஸ் ஆப் லிங்க் கிளிக் செய்யவும்…

https://whatsapp.com/channel/0029Va6ahuJ2UPBOuJiyLl46